Stória

2010-01-25T12:40:00.000-08:00

L grupo de Pauliteiros de la Cidade de Miranda de l Douro fizo la sue purmeira apariçon pública, ne l die 23 de Dezembre de 2006, ne l Auditório Municipal de Miranda de l Douro, delantre dua sala cumpletamente chena, adonde fameliares i amigos biran nacer ua de ls mais promissores grupos de pauliteiros de l praino mirandés.
L grupo, formado por moços nacidos i criados na cidade de Miranda de l Douro, fui criado cul oubjetibo de defender, preserbar i dibulgar la cultura mirandesa.
Anque seia un grupo moço, ls Pauliteiros de Miranda de l Douro, ténen yá un basto curriclo, cuntando cun atuaçones ne ls percipales eibentos culturales nacionales i anternacionales.
De çtacar, la Fiesta de l Abante, Lisboua an Fiesta, Serralbes an Fiesta an performance criatiba cula artista norte-america Marie Normand, Festibales Nacionales i Anternacionales de Folclore i Beilças de Palos, cunferéncias, feiras i sposiçones, arraiales, fiestas populares, bien cumo dibersas atuaçones an telebison (Final de l cuncurso Beilça na Praça, Praça de la Alegrie, Pertual ne l Coraçon na RTP i Parada SIC performance cun Roberto Leal).
Ne l'anho de 2009, ls Pauliteiros de la Cidade de Miranda de l Douro, participórun nua cúrtie-metraige de l rializador pertués Manoel de Oliveira, subre ls "Painéis de São Vicente de Fora", i na grabaçon de l bideo-clip "Ne l colo de l Douro", de la banda portuense, "Trabalhadores do Comércio".

L Grupo de Pauliteiros de la Cidade de Miranda de l Douro cunta hoije cun bariados tipos de spetaclos:

Atuaçones de palco;
Animaçon de rue i arruadas;
Performances criatibas cun outros artistas;
Recriaçones stóricas;
Workshops i Ouficinas de pauliteiros i bailesas tradecionales